Asasarput Kalaallit Nunaanniit atuartuutigilersinnaasarput
Quppernerup ataani naatsunnguamik efterskoletsinnut paasissutissat, kalaallisut atuarsinnaavatit. Paasissutissanik annertunerusunik pisariaqartitsissaguit, quppernerni allani qallunaatut allaaserineqarsimasut takusinnaavatit.
Efterskoleuvugut kristumiutut naleqartitat malillugit ingerlataqartut. Atuartuutigut tamaasa allannguerusussuseqarlutik ullut tamaasa sukataarussussuseqarsinnaasutut upperaavut.
Atuartunut 90-it tungaanut inissaaseqarpugut, amerlanerit marluuttarissani ineqateqartarput, niviarsiaqqanut nukappiaqqanullu immikkoortortaqarfitsinni. Inaatigut pingasuuttarissat sisamaapput.
8. aamma 9. klassemiittuuguit fag-it ingerlavissat tallimaapput tassaasut: Atuakkiornermut tunngasut, Tusagassiutilerinermut tunngasut, Eqqumiitsuliornermut / ilusilersuinermut (Design) tunngasut, Timersornermut tunngasut aammalu E-Sportimut tunngasut.
10. klassemiittuuguit, ingerlavinnik fag-inik marlunnik amerlanernik toqqaassaatit. Tassani toqqagassat assigiinngitsut marluupput ukuusut: Eqqumiitsuliorneq, Nipilersorneq imaluunniit Tusagassiutilerineq. Aappaanilu toqqagassat ukuusut: Upperisarsiorneq, Silami susassaqarneq (Outdoor) aammalu Ilusilersuineq.
Atuartut tamarmik linjefagit saniatigut marlunnik toqqagassaqarput. Tassani 8. – 9. klasset fag-it toqqagassaat tassaapput: Nipilersorneq, Upperisarsiorneq aammalu Silami misigisassarsiorneq (Outdoor) – aammali periarfissat allarpassuupput.
Atuartuutitsinnut atassuteqatigiinnitta pitsaasuunissaa pingaarullugu suliniuteqartuartuuvugut, aammalu atuartunut sinaakkutissaasut pisariaqavissut aalluppagut, atuartut uagutsinnut tatiginnilernissaanik periarfissiisut.
Ilinnut naatsorsuutigisagut makkuupput:
Kalaallit Nunaanniit atuartuutissagut qallunaatut oqalussinnaanissaat naatsorsuutigaarput. Qallunaavittut oqalussinnaanissaat piumasaqaataanngilaq, kisiannili oqaloqatigiinnermi peqataasinnaaneq, aammalu paasissutissanik paasinnissinnaanissat naatsorsuutigaarput. Aammalu naatsorsuutigaarput atuartitsinermi, skemat malillugit sukumiisumik peqataalluartarnissat.
Efterskolemiissinnaanissannut aalajangiisuulluinnassaaq, Danmarkimi attaveqaateqarnissat/angajoqqaarsiaqarnissat, taakkununnga sapaatit akunnerisa naanerini matoqqaffitsinni aammalu feeriarfinni angerlartarfissaqartariaqassangavit.